La Liga har bir klub uchun tarkib va murabbiylarga sarflanadigan xarajatlarning yangilangan limiti bo‘yicha ma’lumotlarni e’lon qildi.

"Barselona"ning ko‘rsatkichi yozgi transfer oynasidan keyingi 351 million yevrodan, qishki oynadan so‘ng 432 million yevrogacha ko‘tarildi — bu ligadagi ikkinchi natijadir. Qayd etilishicha, Ispaniyaning amaldagi chempionlari hamon belgilangan chegaradan tashqarida va "1:1" qoidasiga (har bir ishlab topilgan yevroni sarflash imkoniyati) amal qila olmayaptilar.

Ruxsat etilgan xarajatlar bo‘yicha "Real" hamon yetakchilik qilmoqda. Madridliklar 761 million yevro sarflashlari mumkin — bu sentyabr oyidagi ko‘rsatkich bilan bir xil.

Uchinchi o‘rinda 336 million yevrolik limit bilan "Atletiko" bor — "matraschilar" avvalgi ma’lumotlarga qaraganda xarajatlar shiftini 10 millionga oshirishgan.

Shuningdek, 100 million yevrolik dovondan "Vilyarreal" (173 mln), "Atletik" (132 mln), "Real Sosyedad" (128 mln) va "Betis" (122 mln) klublari ham o‘tishdi.

Eng past ko‘rsatkich "Levante"da qayd etildi — jamoaning limiti 35 milliondan 17 million yevrogacha qisqargan.