"Liverpul" darvozaboni Alisson Bekker Italiyaga qaytishi mumkin.
La Repubblica nashri bergan ma’lumotlarga ko‘ra, joriy yozda braziliyalik posbonni o‘z safiga qo‘shib olishga "Inter" va "Yuventus" klublari jiddiy qiziqish bildirmoqda. Har ikki Italiya grandi yozgi transfer oynasida darvoza chizig‘ini kuchaytirishni rejalashtirgan va Alisson ular uchun asosiy nomzod bo‘lib turibdi.
Alisson 2018 yilda "Roma"dan "Liverpul"ga 72 million yevro evaziga o‘tgan edi. Uning amaldagi shartnomasi 2027 yil 30 iyunga qadar mo‘ljallangan. Joriy mavsumda braziliyalik golkiper "qizillar" safida barcha turnirlarda 30 ta o‘yin o‘tkazib, o‘z darvozasidan 32 ta to‘p olib chiqdi va 12 ta uchrashuvda darvozasi daxlsizligini saqlab qoldi. Transfermarkt portali Alissonning transfer qiymatini 17 million yevroga baholamoqda.
