Hujumchi Estevao nima uchun aynan "Chelsi"ga o‘tishga qaror qilgani haqida so‘zlab berdi.

"Oilam boshqa klublarning qarorgohlarida ham bo‘lishdi, lekin mening e’tiborimni aynan "Chelsi" tortdi. "Chelsi" loyihasi boshqalardan shunisi bilan farq qilardiki, bu jamoa o‘ynash uchun ko‘proq imkoniyat beradi. Men "Chelsi" men uchun ideal variant bo‘ladi deb o‘yladim, chunki u yerda ko‘proq o‘yin amaliyotiga ega bo‘lishim mumkin edi", — dedi Estevao The Sun nashriga bergan intervyusida.

Estevao 2025 yilning yozida "Palmeyras"dan 45 million yevro evaziga "Chelsi"ga ko‘chib o‘tgan edi. Forvardning London klubi bilan shartnomasi 2033 yil 30 iyunga qadar mo‘ljallangan. Joriy mavsumda yosh braziliyalik "ko‘klar" safida barcha turnirlarda 32 ta o‘yinda maydonga tushib, yettita gol urdi va uchta golli uzatmani amalga oshirdi.