Yarim himoyachi Kobbi Maynuning "Manchester Yunayted"dagi kelajagi hali ham noaniq bo‘lib qolmoqda.

Jurnalist Natan Salta bergan ma’lumotlarga ko‘ra, futbolchi bilan shartnomani uzaytirish bo‘yicha muzokaralar cho‘zilmoqda. Ruben Amorim ketganidan so‘ng, futbolchi asosiy tarkibga qayta boshladi va vaziyat bir oz yaxshilandi. Shunga qaramay, tomonlar hali ham maosh miqdori bo‘yicha bir qarorga kela olishmayapti.

Kobbi Maynu "Manchester Yunayted" tarbiyalanuvchisi hisoblanadi. Uning klub bilan amaldagi shartnomasi 2027 yil 30 iyunga qadar mo‘ljallangan bo‘lib, unda muddatni yana bir yilga uzaytirish imkoniyati ham bor. Joriy mavsumda 20 yoshli yarim himoyachi "qizil iblislar" safida barcha turnirlarda 21 ta o‘yinda ishtirok etib, uchta golli uzatmani amalga oshirdi. Transfermarkt portali Maynuning transfer qiymatini 40 million yevroga baholamoqda.