Dushanba kuni Madridning «Real» klubi La Liga doirasidagi o‘z uy uchrashuvida kutilmaganda «Xetafe»ga imkoniyatni boy berdi (0:1). Bu muvaffaqiyatsizlik «qaymoqranglilar» uchun chempionatdagi ketma-ket ikkinchi mag‘lubiyat bo‘ldi — bundan avvalgi turda jamoa «Osasuna»dan mag‘lub bo‘lgan edi (1:2).

Jurnalist Migel Anxel Diasning ma’lumotiga ko‘ra, «Xetafe» bilan o‘yindagi muvaffaqiyatsizlikdan so‘ng bosh murabbiy Alvaro Arbeloa jamoa sardorlari bilan maxsus uchrashuv o‘tkazgan. Shuningdek, mutaxassis barcha futbolchilar va murabbiylar shtabi bilan ham uzoq vaqt suhbatlashgan. Murabbiyning asosiy murojaati — qiyinchiliklarga qaramay, mavsumning qolgan qismida jipslashish va maksimal harakat qilish zarurligi haqida bo‘ldi.

Hozirda «Real» 26-turdan so‘ng La Liga turnir jadvalida peshqadamlik qilayotgan «Barselona»dan to‘rt ochkoga ortda qolmoqda.