«Xetafe»dan uchralgan mag‘lubiyat Madridning «Real» klubidagi «ma’yus» muhit haqidagi yangi gap-so‘zlar to‘lqinini boshlab yubordi.

«Qaymoqranglilar» o‘z uylarida kutilmaganda imkoniyatni boy berishdi (0:1) va turnir jadvalida peshqadamlik qilayotgan «Barselona» bilan oradagi farqni qisqartira olishmadi. 26-turdan so‘ng «ko‘k-anorranglilar» madridliklarni to‘rt ochkoga ortda qoldirmoqda. Biroq Cadena SER xabariga ko‘ra, «Real» futbolchilari juda pessimistik kayfiyatda va La Ligada g‘olib chiqishlariga ishonishmayapti. Dushanba kungi muvaffaqiyatsizlikdan so‘ng o‘yinchilar o‘zlarini «mutlaqo ojiz» his qilishgan.

Avvalroq xabar berilganidek, «Real»da bosh murabbiy Alvaro Arbeloaga ham ishonishmayapti — unga «vaqtinchalik murabbiy» sifatida qarashmoqda va unga jamoani ruhlantirish qiyin kechmoqda.