«Barselona» hujumchisi Ferran Torres jamoaning yaqinda Ispaniya Kubogidan chiqib ketgani haqida fikr bildirdi. Kataloniya grandi yarim finalning javob uchrashuvida o‘z maydonida Madridning «Atletiko» klubini mag‘lub etdi (3:0), biroq dastlabki bahsdagi 0:4 hisobidagi mag‘lubiyat sababli ikki o‘yin natijasiga ko‘ra imkoniyatni boy berdi.

«Biz qaddimizni tik tutamiz va bor kuchimiz bilan kurashishda davom etamiz. Biz jamoa sifatida nimalarga qodir ekanimizni ko‘rsatdik va nimani xohlayotganimizni juda yaxshi bilamiz», — deb yozdi Torres o‘zining ijtimoiy tarmoqlardagi sahifasida.

Hozirda «Barselona» La Liga turnir jadvalida Madridning «Real» klubini to‘rt ochkoga ortda qoldirgan holda peshqadamlik qilmoqda. Shuningdek, Xans-Diter Flik shogirdlari Chempionlar ligasidagi ishtirokini ham davom ettirishmoqda — 1/8 finalda ular Angliyaning «Nyukasl» jamoasiga qarshi maydonga tushishadi.