«Yuventus» hujumchisi Dushan Vlaxovich jarohatidan so‘ng maydonga qaytishga yaqin turibdi. Bu haqda La Gazzetta dello Sport nashri xabar bermoqda.

Nashrning qayd etishicha, Vlaxovich allaqachon umumiy guruh mashg‘ulotlarida qisman ishtirok etmoqda. Futbolchining tiklanish jarayoni kutilganidan tezroq bormoqda (avvalroq uning mart oyi oxirida qaytishi taxmin qilingan edi).

Vlaxovich sonining yaqinlashtiruvchi mushak paylari yirtilishi sababli o‘tgan yilning noyabr oyidan beri maydonga tushmayotgan edi. Bosh murabbiy Luchano Spalletti uni asosiy tarkibga qaytarishga shoshilmoqchi emas. Kutilishicha, Vlaxovich 14 mart kuni bo‘lib o‘tadigan «Udineze»ga qarshi o‘yin qaydnomasidan joy oladi.

26 yoshli serbiyalik hujumchi joriy mavsumda 17 ta o‘yinda maydonga tushib, 6 ta gol va 2 ta golli uzatmani o‘z hisobiga yozdirib qo‘ygan.