«Ювентус» ҳужумчиси Душан Влахович жароҳатидан сўнг майдонга қайтишга яқин турибди. Бу ҳақда La Gazzetta dello Sport нашри хабар бермоқда.

Нашрнинг қайд этишича, Влахович аллақачон умумий гуруҳ машғулотларида қисман иштирок этмоқда. Футболчининг тикланиш жараёни кутилганидан тезроқ бормоқда (аввалроқ унинг март ойи охирида қайтиши тахмин қилинган эди).

Влахович сонининг яқинлаштирувчи мушак пайлари йиртилиши сабабли ўтган йилнинг ноябрь ойидан бери майдонга тушмаётган эди. Бош мураббий Лучано Спаллетти уни асосий таркибга қайтаришга шошилмоқчи эмас. Кутилишича, Влахович 14 март куни бўлиб ўтадиган «Удинезе»га қарши ўйин қайдномасидан жой олади.

26 ёшли сербиялик ҳужумчи жорий мавсумда 17 та ўйинда майдонга тушиб, 6 та гол ва 2 та голли узатмани ўз ҳисобига ёздириб қўйган.