Braziliya terma jamoasi bosh murabbiyi Karlo Anchelotti navbatdagi yig‘inga Neymarni chaqirish imkoniyatini ko‘rib chiqmoqda. Mart oyida «selesao» JCH-2026ga tayyorgarlik doirasida Fransiya va Xorvatiya terma jamoalariga qarshi o‘rtoqlik uchrashuvlarini o‘tkazadi.

UOL Esporte nashrining xabar berishicha, Rodrigoning jiddiy jarohatidan so‘ng Neymarning Braziliya terma jamoasiga qaytish imkoniyatlari sezilarli darajada oshgan. Anchelotti ayni damda 34 yoshli hujumchini tarkibga jalb etish borasida yakuniy qarorga kelish ustida bosh qotirmoqda.

Neymar Braziliya terma jamoasi safida jami 128 ta o‘yin o‘tkazib, 79 ta gol va 59 ta golli uzatmani amalga oshirgan. U oxirgi marta «selesao» libosida 2023 yilning oktyabr oyida maydonga tushgan edi.