«Real Madrid» kelayotgan yozda himoya chizig‘ini kuchaytirishi deyarli aniq bo‘lib ulgurgan. Madrid klubi doimiy ravishda Dortmundning «Borussiya» jamoasi markaziy himoyachisi Niko Shlotterbek bilan bog‘lanmoqda.

Jurnalist Matteo Morettoning ijtimoiy tarmoqlarda xabar berishicha, «Borussiya» Shlotterbek bilan shartnomani uzaytirishni istamoqda. Biroq 26 yoshli futbolchi yangi kelishuvga shoshilmayapti, chunki u «Real» tomonidan bo‘layotgan qiziqishdan xabardor. Ta’kidlanishicha, Nikoning o‘zi ham «qirollik klubi» libosini kiyish g‘oyasiga katta qiziqish bildirmoqda.

Transfermarkt portali mutaxassislari Niko Shlotterbekni 55 million yevroga baholashmoqda. Himoyachi Germaniya milliy terma jamoasi safida allaqachon 23 ta o‘yinda ishtirok etishga ulgurgan.