Shanba oqshomida Ispaniya chempionatining yigirma yettinchi turi doirasida «Atletik» va «Barselona» jamoalari futbol maydonida o‘zaro to‘qnashadilar. Bilbao jamoasi bosh murabbiyi Ernesto Valverde ushbu bahsda revansh olish istagida ekanini ma’lum qildi.

«Albatta, biz «Barselona»dan o‘ch olmoqchimiz. Ular o‘z raqiblariga nisbatan shafqat qilishmaydi. Ular — amaldagi chempionlar, hozirgi peshqadamlar va yana La Ligada g‘alaba qozonish uchun asosiy da’vogarlardir», — dedi Valverde matbuot anjumanida jurnalistlarga.

Birinchi davrada «Barselona» o‘z maydonida «Atletik»ni 4:0 hisobida mag‘lub etgan edi. Yanvar oyida esa jamoalar Ispaniya Superkubogi yarim finalida to‘qnash kelishdi va unda kataloniyaliklar 5:0 hisobida zafar quchishdi.