Шанба оқшомида Испания чемпионатининг йигирма еттинчи тури доирасида «Атлетик» ва «Барселона» жамоалари футбол майдонида ўзаро тўқнашадилар. Бильбао жамоаси бош мураббийи Эрнесто Вальверде ушбу баҳсда реванш олиш истагида эканини маълум қилди.
«Албатта, биз «Барселона»дан ўч олмоқчимиз. Улар ўз рақибларига нисбатан шафқат қилишмайди. Улар — амалдаги чемпионлар, ҳозирги пешқадамлар ва яна Ла Лигада ғалаба қозониш учун асосий даъвогарлардир», — деди Вальверде матбуот анжуманида журналистларга.
Биринчи даврада «Барселона» ўз майдонида «Атлетик»ни 4:0 ҳисобида мағлуб этган эди. Январь ойида эса жамоалар Испания Суперкубоги ярим финалида тўқнаш келишди ва унда каталонияликлар 5:0 ҳисобида зафар қучишди.
