Hujumchi Evan Fergyusonning «Roma»dagi faoliyati o‘z nihoyasiga yetmoqda. Rimliklar safida ijara asosida to‘p surayotgan «Brayton» hujumchisi, katta ehtimol bilan, to‘pig‘idagi operasiya sababli mavsumning qolgan qismini o‘tkazib yuboradi.
21 yoshli irlandiyalik futbolchi APLdagi faoliyatini boshlagan kezlarida juda istiqbolli o‘yinchi hisoblangan edi, biroq jarohatlar unga doimiy ravishda xalaqit bermoqda. Jumladan, 2023/24 yilgi mavsumdagi tizza bog‘lamlarining uzilishi va 2024/25 yilgi mavsum boshidagi sog‘lig‘i bilan bog‘liq muammolar shular jumlasidandir, deb yozadi Football Italia.
Fergyuson «Roma» tarkibida 22 ta o‘yinda maydonga tushib, 5 ta gol urdi va 2 ta golli uzatmani amalga oshirdi, shundan so‘ng yana to‘pig‘idan jarohat oldi. Endi u operasiya uchun Buyuk Britaniyaga yo‘l oladi, shu sababli mavsum u uchun amalda yakunlandi. Ko‘rinib turibdiki, bu voqealardan keyin «Roma» futbolchining transferini sotib olmaydi.
