Italiyaning «Lasio» klubi darvozaboni Ivan Provedel yaqin kunlarda yelkasida jarrohlik amaliyotini o‘tkazadi. Bu haqda Sky Sport Italia nashri xabar bermoqda.
Manbaning ta’kidlashicha, futbolchi olgan jarohat mavsumning muddatidan oldin yakunlanishiga olib kelishi mumkin. Bu esa unchalik muvaffaqiyatli mavsumni o‘tkazmayotgan jamoa uchun jiddiy zarbadir. «Lasio»ni oldinda Italiya Kubogi yarim finali doirasida «Atalanta»ga qarshi javob uchrashuvi hamda A Seriyadagi bir qator muhim o‘yinlar kutmoqda. Rimliklar hozirda turnir jadvalida 11-o‘rinni egallab turibdi.
Klub Xristos Mandasni ijaraga berib yuborgani sababli, darvozadan joyni shu yil boshida «Redjana»dan 1,2 million yevro evaziga sotib olingan 21 yoshli Edoardo Motta egallashi mumkin.
Yana bir mavjud variant — «Lasio» akademiyasi tarbiyalanuvchisi bo‘lgan 24 yoshli Alessio Furlanetto hisoblanadi, biroq u hali asosiy jamoa safida birorta ham o‘yinda maydonga tushmagan.
