Италиянинг «Лацио» клуби дарвозабони Иван Проведель яқин кунларда елкасида жарроҳлик амалиётини ўтказади. Бу ҳақда Sky Sport Italia нашри хабар бермоқда.
Манбанинг таъкидлашича, футболчи олган жароҳат мавсумнинг муддатидан олдин якунланишига олиб келиши мумкин. Бу эса унчалик муваффақиятли мавсумни ўтказмаётган жамоа учун жиддий зарбадир. «Лацио»ни олдинда Италия Кубоги ярим финали доирасида «Аталанта»га қарши жавоб учрашуви ҳамда А Сериядаги бир қатор муҳим ўйинлар кутмоқда. Римликлар ҳозирда турнир жадвалида 11-ўринни эгаллаб турибди.
Клуб Христос Мандасни ижарага бериб юборгани сабабли, дарвозадан жойни шу йил бошида «Реджана»дан 1,2 миллион евро эвазига сотиб олинган 21 ёшли Эдоардо Мотта эгаллаши мумкин.
Яна бир мавжуд вариант — «Лацио» академияси тарбияланувчиси бўлган 24 ёшли Алессио Фурланетто ҳисобланади, бироқ у ҳали асосий жамоа сафида бирорта ҳам ўйинда майдонга тушмаган.
