Madridning «Atletiko» klubi bosh murabbiyi Diyego Simeone Antuan Grizmanning kelajagi borasidagi savolga javob berdi.
Mish-mishlar 34 yoshli hujumchining «Orlando Siti»ga o‘tishi mumkinligini ko‘rsatmoqda, buning ustiga MLSda transfer oynasi mart oyida ochiqligi sababli kelishuv yaqin orada amalga oshishi ham mumkin edi. Biroq, ko‘rinishidan, fransiyalik futbolchi mavsum yakuniga qadar «matraschilar» safini tark etmaydi.
«Tez orada Grizmann o‘z kelajagi borasida bayonot bilan chiqadi. Odamlar xursand bo‘lishadi», — deya jurnalist Viktor Eskutia Simeonening so‘zlarini keltirmoqda.
Antuan Grizmannning «Atletiko» bilan shartnomasi 2027 yilning o‘rtalariga qadar mo‘ljallangan. Shanba kuni hujumchi golli uzatmani amalga oshirib, madridliklarga «Real Sosyedad» ustidan g‘alaba qozonishda (3:2) yordam berdi.
