«Barselona» bosh murabbiyi Xans-Diter Flik Chempionlar ligasi 1/8 finali doirasidagi «Nyukasl»ga qarshi bo‘lajak o‘yinda Ronald Arauxoni asosiy tarkibda tushirishga tayyor.

To‘qnashuvning dastlabki bahsi 10 mart kuni Angliyada bo‘lib o‘tadi. Mundo Deportivo nashrining ma’lumotlariga ko‘ra, Arauxo xuddi jamoalarning sentyabr oyidagi uchrashuvida bo‘lgani kabi, asosiy tarkibda ko‘rinish berishi mumkin. «Ko‘k-anorranglilar» ustozining fikricha, urugvaylik himoyachining jismoniy ma’lumotlari «qarg‘alar»ga qarshi o‘yinda, ayniqsa, raqibning «ulkan» hujumchisi Nik Voltemade bilan bo‘ladigan duellarda «Barsa»ga juda qo‘l keladi.

Ronald Arauxo ta’tildan qaytganidan beri «Barselona»ning asosiy tarkibida faqat bir marta maydonga tushgan, bu voqea Ispaniya kubogi doirasida Segunda vakili — «Albasete»ga qarshi o‘yinda sodir bo‘lgan edi.