“Real Madrid” va “Bayer” klublarining sobiq ustozi Xabi Alonso joriy mavsum yakunlangach, “Liverpul” bosh murabbiyiga aylanishi deyarli aniq. Bu haqda OK Diario nashri xabar berdi.

Manbaning ma’lum qilishicha, Alonso va Angliya klubi o‘rtasida hamkorlik bo‘yicha og‘zaki kelishuv mavjud. Tomonlar uch yillik shartnoma imzolashi taxmin qilinmoqda.

Shu bilan birga, ushbu kelishuvning amalga oshishi “Liverpul”ning amaldagi murabbiyi Arne Slot boshqaruvidagi natijalarga bog‘liq bo‘ladi. Ta’kidlanishicha, agar mersisaydliklar joriy mavsumda UYEFA Chempionlar ligasida g‘olib chiqsa, Alonso bilan kelishuv o‘z kuchini yo‘qotishi mumkin.

“Liverpul” vakillari va Alonsoning yaqinlari o‘rtasidagi ilk norasmiy aloqalar 2025 yil noyabr oyi oxirida, mutaxassis o‘zining avvalgi ish joyidagi natijalari tufayli bosim ostida qolgan paytda bo‘lib o‘tgan. O‘shanda “Enfild” klubi rahbariyati ispaniyalik murabbiyni keyingi mavsumdan taklif qilish imkoniyatlarini o‘rganishni boshlagan edi.

Ma’lumot uchun, Xabi Alonso 2026 yilning yanvar oyi o‘rtalarida “Real”dagi birinchi mavsumidayoq iste’foga chiqarilgan edi.

Hozirda “Liverpul” Angliya Premyer Ligasida 30 ta uchrashuvdan so‘ng 48 ochko jamg‘argan holda turnir jadvalida 6-o‘rinni egallab turibdi. Mersisayd klubi UYEFA Chempionlar Ligasi 1/8 final bosqichi doirasida “Galatasaroy”ga (Turkiya) qarshi bahs olib boradi.