«Atalanta» bosh murabbiyi Raffaele Palladino UEFA Chempionlar ligasi 1/8 finalidan o‘rin olgan Myunxenning «Bavariya» jamoasiga qarshi bo‘lajak dastlabki o‘yin haqida fikr bildirdi.
«Bizni sehrli oqshom, haqiqiy bayram kutmoqda. Chempionlar ligasi 1/8 finalida dunyoning eng kuchli jamoalaridan biriga qarshi o‘ynash — bu bir orzu. Orzular esa ushalishi uchun mavjuddir. Biz o‘yindan zavq olishni va «Bavariya»ga muammolar tug‘dirishni istaymiz. Biz o‘z uyimizdamiz, shunday ekan, umid qilamanki, «Borussiya» bilan o‘yinda ko‘rganingiz kabi shijoatli o‘yin namoyish eta olamiz.
Chempionlar ligasida Italiyaning yagona vakili bo‘lib qolish — aql bovar qilmas darajada yoqimli tuyg‘u. Butun italiyaliklar sizga muxlislik qilayotganini his etasiz. Menga har tomondan, hatto «Fiorentina» va «Monsa»dagi sobiq shogirdlarimdan ham qo‘llab-quvvatlash so‘zlari kelmoqda», — deya Palladinoning so‘zlarini keltiradi UEFA rasmiy sayti.
Eslatib o‘tamiz, Chempionlar ligasi 1/8 finalining javob uchrashuvi 18 mart kuni Myunxendagi «Arena Myunxen» stadionida bo‘lib o‘tadi.
