FIFA prezidenti Janni Infantino bo‘lajak JCH-2026 haqida o‘z fikrlarini bildirdi.

«Jahon chempionati fantastik va fenomenal tarzda o‘tadi. Qo‘shma Shtatlar, Meksika va Kanadada misli ko‘rilmagan ajiotaj hukm surmoqda. To‘rt hafta ichida biz chiptalar uchun 500 milliondan ortiq ariza oldik. Bu aql bovar qilmas ko‘rsatkich. Bizda deyarli 7 millionta chipta bor, ammo 500 millionta ariza — bu FIFA yoki boshqa biror tashkilot tarixidagi mutlaqo rekord natijadir. 104 ta o‘yindan 77 tasiga bir milliondan ortiq ariza tushgan, qolganlari ham taxminan shu darajada. Biz chiptalarning bir qismini turnir rivoji va final kunlari uchun zaxirada saqlab qo‘yganmiz. Barcha stadionlar liq to‘ladi — bu haqiqiy bayram bo‘ladi.

Ilgari Qo‘shma Shtatlarda futbol yoki ular aytganidek «sokker» unchalik mashhur emas deyishardi, endi bu vaziyat o‘zgardi. Bu katta muvaffaqiyat bo‘ladi. Bu 48 ta jamoa, 104 ta o‘yin, 16 ta shahar va uchta davlat ishtirok etadigan ilk Jahon chempionati... biz juda ulkan voqelik ostonasida turibmiz. Bu shunchaki turnir yoki sport musobaqasidan ko‘ra ko‘proq narsa — bu butun dunyoni to‘xtashga va tomosha qilishga majbur etadigan ijtimoiy hodisadir», — deya Infantinoning so‘zlarini keltiradi AS nashri.