ФИФА президенти Жанни Инфантино бўлажак ЖЧ-2026 ҳақида ўз фикрларини билдирди.

«Жаҳон чемпионати фантастик ва феноменал тарзда ўтади. Қўшма Штатлар, Мексика ва Канадада мисли кўрилмаган ажиотаж ҳукм сурмоқда. Тўрт ҳафта ичида биз чипталар учун 500 миллиондан ортиқ ариза олдик. Бу ақл бовар қилмас кўрсаткич. Бизда деярли 7 миллионта чипта бор, аммо 500 миллионта ариза — бу ФИФА ёки бошқа бирор ташкилот тарихидаги мутлақо рекорд натижадир. 104 та ўйиндан 77 тасига бир миллиондан ортиқ ариза тушган, қолганлари ҳам тахминан шу даражада. Биз чипталарнинг бир қисмини турнир ривожи ва финал кунлари учун захирада сақлаб қўйганмиз. Барча стадионлар лиқ тўлади — бу ҳақиқий байрам бўлади.

Илгари Қўшма Штатларда футбол ёки улар айтганидек «соккер» унчалик машҳур эмас дейишарди, энди бу вазият ўзгарди. Бу катта муваффақият бўлади. Бу 48 та жамоа, 104 та ўйин, 16 та шаҳар ва учта давлат иштирок этадиган илк Жаҳон чемпионати... биз жуда улкан воқелик остонасида турибмиз. Бу шунчаки турнир ёки спорт мусобақасидан кўра кўпроқ нарса — бу бутун дунёни тўхташга ва томоша қилишга мажбур этадиган ижтимоий ҳодисадир», — дея Инфантинонинг сўзларини келтиради AS нашри.