Londonning «Arsenal» klubi afsonaviy sobiq futbolchisi Tyerri Anri Madridning «Real» jamoasi Chempionlar ligasi doirasida «Manchester Siti»ga qarshi kechgan bahsdagi (3:0) ishtiroki haqida o‘z fikrlarini bildirdi.
«Qaymoqranglilar» barcha muammolarga qaramay, 1/8 finalning ilk uchrashuvida «shaharliklar»ni ishonchli tarzda mag‘lub etishdi. Yarim himoyachi Federiko Valverde faoliyatida ilk bor xet-trik qayd etdi.
«Real» libosi nimadan tikilganini bilmayman. Bu qanday sodir bo‘lishini ham tushunmayman, lekin ular Chempionlar ligasida o‘ynayotganda shunchaki o‘zgarib ketishadi. Ehtimol, agar men ham shu libosni kiysam, boshimda yana sochlar o‘sib chiqar», — deya madridliklarning yorqin g‘alabasini muhokama qilayotgan Anri CBS Sports studiyasida hazil aralash fikr bildirdi.
Eslatib o‘tamiz, ushbu qarama-qarshilikning javob o‘yini 17 mart kuni «Etixad» stadionida bo‘lib o‘tadi.
