«Real» Chempionlar ligasi chorak finali sari katta qadam tashladi — madridliklar o‘z maydonida «Manchester Siti»ni 3:0 hisobida mag‘lub etdi. Jamoadagi jiddiy kadrlar muammosiga qaramay, Madrid klubi ajoyib natijaga erishdi.
The Athletic nashrining xabar berishicha, hujumchi Kilian Mbappe Angliyadagi javob uchrashuvida ishtirok etish imkoniyatiga ega. Fransiyalik yulduz tizzasidagi muammo sababli «Real»ning so‘nggi o‘yinlarini o‘tkazib yuborgan edi. Shuningdek, himoyachilar Alvaro Karreras va David Alaba ham javob bahsiga qadar sog‘ayib safga qaytishlari mumkin.
Yarim himoyachi Jud Bellingemga kelsak, uning kelasi hafta «Manchester Siti»ga qarshi o‘ynamasligi kutilmoqda. Chorshanba kungi bahsda zaxiraga olingan Ferlan Mendining holati esa qo‘shimcha tibbiy ko‘rik natijalariga bog‘liq bo‘lib turibdi.
«Manchester Siti» va «Real» o‘rtasidagi javob uchrashuvi 17 mart kuni bo‘lib o‘tadi.
