«Portu» markaziy himoyachisi Tyago Silva faoliyatida ilk bor Yevropa Ligasida maydonga tushdi. Braziliyalik futbolchi 1/8 finalning dastlabki uchrashuvida «Shtutgart»ga qarshi (2:1) bahsda asosiy tarkibda maydonga tushdi va «ajdarlar»ning safardagi g‘alabasiga yordam berdi. «The Touchline» nashrining qayd etishicha, 41 yoshli Silva turnir tarixidagi eng yoshi katta debyutantga (maydondagi o‘yinchilar orasida) aylandi.
Braziliyalik faxriy futbolchi joriy yilning boshida «Portu» safiga kelib qo‘shilgan edi, uning shartnomasi yozgacha mo‘ljallangan. Kelganidan buyon futbolchi Portugaliya grandi libosida 7 ta o‘yinda ishtirok etishga ulgurdi.
«Portu» va «Shtutgart» o‘rtasidagi javob uchrashuvi kelasi payshanba, 19 mart kuni bo‘lib o‘tadi. Ushbu juftlik g‘olibi chorak finalda «Nottingem Forest» yoki «Midtyullann» jamoalaridan biriga qarshi maydonga tushadi.
