«Порту» марказий ҳимоячиси Тьяго Силва фаолиятида илк бор Европа Лигасида майдонга тушди. Бразилиялик футболчи 1/8 финалнинг дастлабки учрашувида «Штутгарт»га қарши (2:1) баҳсда асосий таркибда майдонга тушди ва «аждарлар»нинг сафардаги ғалабасига ёрдам берди. «The Touchline» нашрининг қайд этишича, 41 ёшли Силва турнир тарихидаги энг ёши катта дебютантга (майдондаги ўйинчилар орасида) айланди.

Бразилиялик фахрий футболчи жорий йилнинг бошида «Порту» сафига келиб қўшилган эди, унинг шартномаси ёзгача мўлжалланган. Келганидан буён футболчи Португалия гранди либосида 7 та ўйинда иштирок этишга улгурди.

«Порту» ва «Штутгарт» ўртасидаги жавоб учрашуви келаси пайшанба, 19 март куни бўлиб ўтади. Ушбу жуфтлик ғолиби чорак финалда «Ноттингем Форест» ёки «Мидтьюлланн» жамоаларидан бирига қарши майдонга тушади.