Chorshanba oqshomida Chempionlar Ligasi doirasida "Manchester Siti"ga qarshi kechgan uy uchrashuvida himoyachi Ferlan Mendi zaxiraga olingan edi. Fransiyalik futbolchi tibbiy ko‘rikdan o‘tdi va "Real" klub rasmiy sayti orqali uning natijalarini e’lon qildi.
Mendining o‘ng oyoq son biseps mushagida jarohat aniqlangan. "Qaymoqranglilar" himoyachining tiklanishi uchun qancha vaqt ketishini ochiqlashmagan. Avvalroq paydo bo‘lgan ma’lumotlarga ko‘ra, Mendi "Manchester Siti"ga qarshi javob o‘yinini aniq o‘tkazib yuboradi, shuningdek, kelasi haftadagi "Atletiko" bilan La Liga bahsini ham o‘tkazib yuborish xavfi bor.
"Real" o‘zining navbatdagi o‘yinini 14 mart kuni chempionat doirasida o‘z maydonida "Elche"ga qarshi o‘tkazadi.













