«Arsenal» yarim himoyachisi Deklan Rays jamoaning yaqinda bo‘lib o‘tgan bahsda 16 yoshli Maks Doumanning ko‘rsatgan o‘yini haqidagi taassurotlari bilan o‘rtoqlashdi.
«U shunchaki fantastik. Maydonga tushganida, biz uchun o‘yin oqimini haqiqatan ham o‘zgartirib yubordi. Hali 16 yoshda bo‘lishiga qaramay, u to‘p nazoratini qaytarishda yordam berdi va jamoaga energiya olib kirdi. Biz hammamiz unga ishonamiz», — deb ta’kidladi Rays.
«Everton»ga qarshi bahsda Douman 74-daqiqada, hisob 0:0 bo‘lib turgan vaqtda zaxiradan maydonga tushdi. 89-daqiqada Dyokeresh hisobni ochgan bo‘lsa, 90+7-daqiqada Douman «kanonirlar»ning ustunligini mustahkamladi va Angliya Premyer-ligasi tarixidagi eng yosh gol muallifiga aylandi.
APLdagi 31 ta o‘yindan so‘ng chempionat peshqadami «Arsenal» 70 ochko jamg‘ardi. Bu 2-o‘rindagi «Siti»dan 9 ochko ko‘p demakdir, biroq Gvardiola jamoasida zaxira o‘yini va «Arsenal»ga qarshi o‘z uyidagi o‘zaro bahs mavjud.
