«Арсенал» ярим ҳимоячиси Деклан Райс жамоанинг яқинда бўлиб ўтган баҳсда 16 ёшли Макс Доуманнинг кўрсатган ўйини ҳақидаги таассуротлари билан ўртоқлашди.

«У шунчаки фантастик. Майдонга тушганида, биз учун ўйин оқимини ҳақиқатан ҳам ўзгартириб юборди. Ҳали 16 ёшда бўлишига қарамай, у тўп назоратини қайтаришда ёрдам берди ва жамоага энергия олиб кирди. Биз ҳаммамиз унга ишонамиз», — деб таъкидлади Райс.

«Эвертон»га қарши баҳсда Доуман 74-дақиқада, ҳисоб 0:0 бўлиб турган вақтда захирадан майдонга тушди. 89-дақиқада Дьёкереш ҳисобни очган бўлса, 90+7-дақиқада Доуман «канонирлар»нинг устунлигини мустаҳкамлади ва Англия Премьер-лигаси тарихидаги энг ёш гол муаллифига айланди.

АПЛдаги 31 та ўйиндан сўнг чемпионат пешқадами «Арсенал» 70 очко жамғарди. Бу 2-ўриндаги «Сити»дан 9 очко кўп демакдир, бироқ Гвардиола жамоасида захира ўйини ва «Арсенал»га қарши ўз уйидаги ўзаро баҳс мавжуд.