The Athletic nashrining xabar berishicha, Kyortis Jonsning «Liverpul»dagi kelajagi borasida noaniqlik ortib bormoqda. Yarim himoyachi shu yozda amaldagi shartnomasining so‘nggi yiliga qadam qo‘yadi, uning kelishuvi 2027 yilning iyun oyida yakuniga yetadi.

Uning mahalliy tarbiyalanuvchi sifatida muhim maqomga ega ekanligiga qaramay, shartnomani uzaytirish bo‘yicha muzokaralarda haligacha siljish kuzatilgani yo‘q. Ushbu vaziyat bir qator klublarni sergak torttirdi. Ma’lumotlarga ko‘ra, «Inter» va «Tottenxem» yanvar oyida futbolchini sotib olish imkoniyatlarini o‘rganib chiqishgan.

Noaniqlikka sabab bo‘layotgan asosiy omil — o‘yin vaqti. Jons asosiy tarkibda barqaror joyga ega bo‘lishni istamoqda. U o‘z qadrdon klubi safida 200 dan ortiq o‘yinda maydonga tushgan bo‘lsa-da, Dominik Soboslai va Aleksis Mak Allister kabi futbolchilar bilan raqobat tufayli joriy mavsumda asosiy tarkibda kamroq ko‘rinish bermoqda.

Ushbu mavsumda Jons 36 ta o‘yinda ishtirok etdi (asosan zaxiradan maydonga tushgan holda) va o‘z hisobiga 2 ta gol hamda 2 ta golli uzatmani yozdirib qo‘ydi.