The Athletic нашрининг хабар беришича, Кёртис Жонснинг «Ливерпуль»даги келажаги борасида ноаниқлик ортиб бормоқда. Ярим ҳимоячи шу ёзда амалдаги шартномасининг сўнгги йилига қадам қўяди, унинг келишуви 2027 йилнинг июнь ойида якунига етади.

Унинг маҳаллий тарбияланувчи сифатида муҳим мақомга эга эканлигига қарамай, шартномани узайтириш бўйича музокараларда ҳалигача силжиш кузатилгани йўқ. Ушбу вазият бир қатор клубларни сергак торттирди. Маълумотларга кўра, «Интер» ва «Тоттенхэм» январь ойида футболчини сотиб олиш имкониятларини ўрганиб чиқишган.

Ноаниқликка сабаб бўлаётган асосий омил — ўйин вақти. Жонс асосий таркибда барқарор жойга эга бўлишни истамоқда. У ўз қадрдон клуби сафида 200 дан ортиқ ўйинда майдонга тушган бўлса-да, Доминик Собослаи ва Алексис Мак Аллистер каби футболчилар билан рақобат туфайли жорий мавсумда асосий таркибда камроқ кўриниш бермоқда.

Ушбу мавсумда Жонс 36 та ўйинда иштирок этди (асосан захирадан майдонга тушган ҳолда) ва ўз ҳисобига 2 та гол ҳамда 2 та голли узатмани ёздириб қўйди.