Madridning «Real» klubi o‘z hujum chizig‘ini sezilarli darajada kuchaytirishga intilmoqda va «Galatasaroy» hujumchisi Viktor Osimxen bilan shartnoma imzolash imkoniyatini ko‘rib chiqmoqda.
Haberler nashrining ma’lumotlariga ko‘ra, "qirollik klubi" nigeriyalik forvard uchun 80 milliondan 110 million yevrogacha bo‘lgan miqdorda taklif tayyorlab qo‘ygan.
Xabar qilinishicha, Osimxen «blankos»ning transfer ro‘yxatidagi eng ustuvor nomzodlardan biri hisoblanadi. Manbalarning ta’kidlashicha, klub prezidenti Florentino Peres ushbu ehtimoliy kelishuvni ijobiy baholamoqda va hujumchini kelasi mavsum uchun asosiy maqsad deb hisoblaydi.
Eslatib o‘tamiz, 27 yoshli hujumchi «Napoli»dan «Galatasaroy»ga 75 million yevro evaziga o‘tganidan so‘ng jamoaning asosiy figurasiga aylandi. Ushbu mavsumda forvard Istanbul klubi safida 27 ta o‘yinda maydonga tushib, 18 ta gol urdi va 7 ta golli uzatmani amalga oshirdi.
