«Manchester Siti» ustozi Xosep Gvardiola Madridning «Real» klubiga qarshi bo‘lib o‘tadigan Chempionlar ligasi 1/8 final javob uchrashuvi oldidan jamoadagi holat haqida fikr bildirdi.

Eng nufuzli yevrokubokni tark etmaslik uchun «shaharliklar»ga haqiqiy mo‘’jiza kerak bo‘ladi, ichki chempionatda ham ishlar ko‘ngildagidek emas — «Arsenal» to‘qqiz ochkoga o‘zib ketgan.

«Menga jamoam hamon yoqadi. Bilaman, zamonaviy futbol voqeligini hisobga olsak, hozirda ko‘pchilik bizning o‘yinimizdan mamnun emas, lekin menga bu haqiqatan ham manzur. Biz oxirigacha kurashamiz va kelasi mavsumda yana kuchli bo‘lib qaytamiz», — deya City Xtra Gvardiolaning so‘zlarini keltirmoqda.

«Real» bilan javob uchrashuvi seshanba kuni «Etixad» stadionida bo‘lib o‘tadi. «Santyago Bernabeu»da o‘tgan ilk o‘yinda Angliya grandi 0:3 hisobida imkoniyatni boy bergan edi.