«Манчестер Сити» устози Хосеп Гвардиола Мадриднинг «Реал» клубига қарши бўлиб ўтадиган Чемпионлар лигаси 1/8 финал жавоб учрашуви олдидан жамоадаги ҳолат ҳақида фикр билдирди.

Энг нуфузли еврокубокни тарк этмаслик учун «шаҳарликлар»га ҳақиқий мўъжиза керак бўлади, ички чемпионатда ҳам ишлар кўнгилдагидек эмас — «Арсенал» тўққиз очкога ўзиб кетган.

«Менга жамоам ҳамон ёқади. Биламан, замонавий футбол воқелигини ҳисобга олсак, ҳозирда кўпчилик бизнинг ўйинимиздан мамнун эмас, лекин менга бу ҳақиқатан ҳам манзур. Биз охиригача курашамиз ва келаси мавсумда яна кучли бўлиб қайтамиз», — дея City Xtra Гвардиоланинг сўзларини келтирмоқда.

«Реал» билан жавоб учрашуви сешанба куни «Этихад» стадионида бўлиб ўтади. «Сантьяго Бернабеу»да ўтган илк ўйинда Англия гранди 0:3 ҳисобида имкониятни бой берган эди.