«Liverpul» muxlislari «Tottenxem»ga qarshi bahsdan so‘ng (1:1 hisobidagi durang) o‘z jamoalarini hushtakbozlik bilan kuzatib qo‘yishdi. O‘yindan keyin mersisaydliklar bosh murabbiyi Arne Slot «Enfild» tribunalaridan yangragan ushbu hushtaklarga izoh berdi.
«Men buni mutlaqo normal holat deb hisoblayman. Agar siz muxlislik qiladigan jamoa kutilmagan o‘yinlarda, ayniqsa, bahsning so‘nggi soniyalarida shuncha ochko yo‘qotsa, hammaning hafsalasi pir bo‘lishi tabiiy. Muxlislar bunday holatga odatdagidan ko‘proq duch kelishmoqda. Shuning uchun ularning norozilik bildirishi odatiy holdir. Men ham, futbolchilarimiz ham, muxlislarimiz ham birdek hafsalamiz pir bo‘lganini his qilyapmiz. Ammo ishonchim komil, chorshanba kuni ular yana kelishadi va bizni ilk daqiqalardan boshlab qo‘llab-quvvatlashadi», — dedi Slot Sky Sportsga bergan intervyusida.
18 mart kuni «Liverpul» Chempionlar ligasi doirasida «Galatasaroy»ni qabul qiladi.
