"Chelsi" yarim himoyachisi Pedru Netu "PSJ" bilan o‘yinda bolboy (to‘p uzatib beruvchi bola) bilan sodir bo‘lgan voqea uchun UEFA tomonidan diskvalifikasiya qilinmadi.
Eslatib o‘tamiz, Chempionlar ligasi 1/8 finali dastlabki bahsida "ko‘klar" safarda "PSJ"ga 2:5 hisobida imkoniyatni boy berishgan edi. O‘yin davomida parijliklar bosh murabbiyi Luis Enrike "Park-de-Prens"dagi bolboyga to‘pni raqibga bermaslikni buyurgan. Shundan so‘ng Netu bolaga yaqinlashib, uni itarib yuborgan va to‘pni tortib olgan, natijada bolboy maydonga yiqilgan edi.
O‘yindan so‘ng futbolchi bolakaydan uzr so‘raganini va unga o‘z futbolkasini sovg‘a qilganini ma’lum qildi. UEFA esa sportchiga xos bo‘lmagan xulq-atvor uchun futbolchiga nisbatan intizomiy ish ochgan edi.
Yakunda portugaliyalik vinger sportchiga xos bo‘lmagan harakati uchun ogohlantirish oldi, biroq unga nisbatan diskvalifikasiya yoki jarima choralari qo‘llanilmadi. Bu haqda jurnalist Ben Jeykobs xabar bermoqda.
