"Челси" ярим ҳимоячиси Педру Нету "ПСЖ" билан ўйинда болбой (тўп узатиб берувчи бола) билан содир бўлган воқеа учун УЕФА томонидан дисквалификация қилинмади.
Эслатиб ўтамиз, Чемпионлар лигаси 1/8 финали дастлабки баҳсида "кўклар" сафарда "ПСЖ"га 2:5 ҳисобида имкониятни бой беришган эди. Ўйин давомида парижликлар бош мураббийи Луис Энрике "Парк-де-Пренс"даги болбойга тўпни рақибга бермасликни буюрган. Шундан сўнг Нету болага яқинлашиб, уни итариб юборган ва тўпни тортиб олган, натижада болбой майдонга йиқилган эди.
Ўйиндан сўнг футболчи болакайдан узр сўраганини ва унга ўз футболкасини совға қилганини маълум қилди. УЕФА эса спортчига хос бўлмаган хулқ-атвор учун футболчига нисбатан интизомий иш очган эди.
Якунда португалиялик вингер спортчига хос бўлмаган ҳаракати учун огоҳлантириш олди, бироқ унга нисбатан дисквалификация ёки жарима чоралари қўлланилмади. Бу ҳақда журналист Бен Жейкобс хабар бермоқда.
