«Arsenal» bosh murabbiyi Mikel Arteta jamoa vingeri Noni Maduekeni maqtadi.

«Menimcha, Nonida kuchli xarakter bor, ayniqsa maydonda ishlar yurishmayotgan paytda o‘yinga qo‘shilib, bahs taqdiriga ta’sir o‘tkaza oladi. Unda muvaffaqiyatga erishish uchun zarur bo‘lgan barcha sifatlar mujassam», — deya Artetaning so‘zlarini keltirmoqda «to‘pchilar» matbuot xizmati.

Eslatib o‘tamiz, «Bayer» bilan bo‘lib o‘tgan yaqindagi bahsda aynan Madueke zaxiradan maydonga tushganidan so‘ng «kanonirlar» penalti tepish huquqini qo‘lga kiritib, hisobni tenglashtirishgan edi (1:1). Madueke o‘ng qanotdan «dorishunoslar» jarima maydonchasiga yorib kirib, penalti ishladi. Kay Xavers esa 11 metrlik nuqtadan adashmadi.

Madueke 2025 yilning yozida «Arsenal» a’zosiga aylandi, bungacha u ikki yarim yil davomida «Chelsi» sharafini himoya qilgan.