"Liverpul" bosh murabbiyi Arne Slot jamoaning sobiq futbolchisi Jeymi Karragerning fikriga munosabat bildirdi. Eslatib o‘tamiz, Karrager "qizillar" bir butun jamoa sifatida emas, balki shunchaki individual futbolchilar yig‘indisidek o‘ynayotganini ta’kidlagan edi.

"Men Karragerning bu tahlilini ko‘rmadim. U nima uchun bunday deganini, misollar keltirgan-keltirmaganini ko‘rib chiqishim kerak edi. Mavsum davomida Jeymi aytgan ko‘plab fikrlarga qo‘shilganman. Ammo aynan shu fikriga qo‘shilmayman.

Qaysidir ma’noda qo‘shilishim mumkin, lekin bu bizning har doim ham to‘liq tarkibda o‘ynamayotganimiz bilan bog‘liq. Hozir tafsilotlarga berilmoqchi emasman. Lekin maydonda 11 ta alohida individual ijrochi bor degan fikrga mutlaqo qarshiman. Men birgalikda kurashayotgan jamoani ko‘ryapman. Bu mening shaxsiy fikrim", — dedi Slot matbuot anjumanida.

"Liverpul" navbatdagi uchrashuvini 18 mart kuni Chempionlar Ligasi doirasida "Galatasaroy"ga qarshi o‘tkazadi.