"Ливерпуль" бош мураббийи Арне Слот жамоанинг собиқ футболчиси Жейми Каррагернинг фикрига муносабат билдирди. Эслатиб ўтамиз, Каррагер "қизиллар" бир бутун жамоа сифатида эмас, балки шунчаки индивидуал футболчилар йиғиндисидек ўйнаётганини таъкидлаган эди.
"Мен Каррагернинг бу таҳлилини кўрмадим. У нима учун бундай деганини, мисоллар келтирган-келтирмаганини кўриб чиқишим керак эди. Мавсум давомида Жейми айтган кўплаб фикрларга қўшилганман. Аммо айнан шу фикрига қўшилмайман.
Қайсидир маънода қўшилишим мумкин, лекин бу бизнинг ҳар доим ҳам тўлиқ таркибда ўйнамаётганимиз билан боғлиқ. Ҳозир тафсилотларга берилмоқчи эмасман. Лекин майдонда 11 та алоҳида индивидуал ижрочи бор деган фикрга мутлақо қаршиман. Мен биргаликда курашаётган жамоани кўряпман. Бу менинг шахсий фикрим", — деди Слот матбуот анжуманида.
"Ливерпуль" навбатдаги учрашувини 18 март куни Чемпионлар Лигаси доирасида "Галатасарой"га қарши ўтказади.
