«Arsenal»ning hujumkor yarim himoyachisi Eberechi Eze avvalroq «kanonirlar» safida faqat Teo Uolkottga nasib etgan noyob natijani takrorladi.

Eberechi bir mavsum davomida «Arsenal» ishtirok etayotgan barcha to‘rtta turnirda gol urishga muvaffaq bo‘ldi va Uolkottdan keyin bunday natijaga erishgan ikkinchi ingliz futbolchisiga aylandi. Uolkott ushbu ko‘rsatkichni 2012/13 yilgi mavsumda qayd etgan edi.

Eslatib o‘tamiz, seshanba oqshomida Eze Chempionlar ligasi 1/8 finalidan o‘rin olgan «Bayer»ga qarshi javob o‘yinida shedevr gol muallifiga aylandi. Ingliz futbolchisi 20-23 metrlar chamasi masofadan havodagi to‘pni to‘xtatmasdan darvozaga yo‘llab, Yanis Blasvixni ojiz qoldirdi. To‘p darvozaning chap yuqori burchagiga («to‘qqizlik»ka) aniq borib tushdi. Ikki o‘yin natijasiga ko‘ra «Arsenal» «Bayer»ni ishonchli tarzda mag‘lub etdi — 3:1.