Turkiyaning «Beshiktosh» klubi tayanch yarim himoyachisi Uilfred Ndidi «Manchester Yunayted» qiziqishlari doirasiga tushdi. Bu haqda Sporx nashri xabar bermoqda.
Manbaning ma’lumotiga ko‘ra, «qizil iblislar» 29 yoshli nigeriyalik futbolchini arzonroq narxda sotib olishga harakat qilishlari mumkin. Buning evaziga ular turkiyalik darvozabon Altay Bayindirni «Beshiktosh»ga taklif qilishni rejalashtirmoqda.
Joriy mavsumda Ndidi barcha turnirlarda 24 ta o‘yinda ishtirok etib, ikkita gol urdi va bitta golli uzatmaga mualliflik qildi. Futbolchining klub bilan shartnomasi 2028 yilgacha mo‘ljallangan. Transfermarkt portali yarim himoyachining qiymatini 10 million yevroga baholamoqda.
Ta’kidlash joizki, Ndidi uzoq vaqt davomida Angliyada faoliyat yuritgan — u 2017 yildan 2025 yilgacha «Lester» sharafini himoya qilgan. Nigeriyalik futbolchi faqat o‘tgan yozda Turkiyaga ko‘chib o‘tgan edi.
