Туркиянинг «Бешиктош» клуби таянч ярим ҳимоячиси Уилфред Ндиди «Манчестер Юнайтед» қизиқишлари доирасига тушди. Бу ҳақда Sporx нашри хабар бермоқда.

Манбанинг маълумотига кўра, «қизил иблислар» 29 ёшли нигериялик футболчини арзонроқ нархда сотиб олишга ҳаракат қилишлари мумкин. Бунинг эвазига улар туркиялик дарвозабон Алтай Байиндирни «Бешиктош»га таклиф қилишни режалаштирмоқда.

Жорий мавсумда Ндиди барча турнирларда 24 та ўйинда иштирок этиб, иккита гол урди ва битта голли узатмага муаллифлик қилди. Футболчининг клуб билан шартномаси 2028 йилгача мўлжалланган. Transfermarkt портали ярим ҳимоячининг қийматини 10 миллион еврога баҳоламоқда.

Таъкидлаш жоизки, Ндиди узоқ вақт давомида Англияда фаолият юритган — у 2017 йилдан 2025 йилгача «Лестер» шарафини ҳимоя қилган. Нигериялик футболчи фақат ўтган ёзда Туркияга кўчиб ўтган эди.