«Chelsi» bosh murabbiyi Liem Rosenyor himoyachi Trevo Chaloba jarohati sabab bir oydan ko‘proq vaqtni o‘tkazib yuborishini ma’lum qildi.

26 yoshli futbolchi Chempionlar ligasi 1/8 finali doirasida «PSJ»ga qarshi kechgan javob uchrashuvida (0:3, birinchi o‘yin – 2:5) to‘pig‘idan jarohat olgan edi. U maydonni zambilda tark etgandi.

«Trevning yo‘qligi doim yomon, lekin jarohat biz boshida o‘ylaganchalik og‘ir emas. U baribir jiddiy, ammo tiklanish taxminan olti hafta davom etadi», — dedi murabbiy.

Filip Yorgensen haqida: «Filip skanerdan o‘tdi va unga kichik jarrohlik amaliyoti kerak bo‘ldi. U qadar jiddiy emas, bu bir necha hafta vaqt talab etadigan masala».

Ris Jeyms haqida: «Risning holatini terma jamoalar tanaffusidan keyin batafsilroq baholaymiz. Unchalik jiddiy emas, lekin sonning orqa mushagida nimadir bor. Uning holatiga tanaffusdan so‘ng aniqlik kiritamiz», — dedi Rosenyor.