Londonning «Chelsi» jamoasi barcha musobaqalarda ketma-ket to‘rtinchi mag‘lubiyatini qabul qilib oldi. So‘nggi o‘yinda «ko‘klar» Angliya Premyer-ligasining 31-turida «Everton»ga 0:3 hisobida imkoniyatni boy berdi.

Xill Dikinson stadionida o‘tgan bahsda mezbonlar safida Betu dubl qayd etgan bo‘lsa, Iliman Ndiaye yana bir golga mualliflik qildi.

Shu tariqa, «Chelsi»ning omadsiz seriyasi davom etmoqda. Bu mag‘lubiyatlar zanjiri "PSJ"ga qarshi Chempionlar ligasi 1/8 finalining birinchi o‘yinidan boshlangan bo‘lib, o‘sha bahsda londonliklar 2:5 hisobida yutqazgandi. Keyin «Nyukasl Yunayted»ga qarshi Premyer-liga o‘yinida 0:1 hisobida mag‘lubiyat qayd etildi.

Javob uchrashuvida ham «PSJ» «ko‘klar» darvozasiga javobsiz uchta gol urdi. Endi esa xuddi shu ssenariy «Everton»ga qarshi bahsda ham takrorlandi.

Natijada, so‘nggi to‘rt uchrashuvda «Chelsi» 2 ta gol urib, o‘z darvozasidan 12 ta to‘p olib chiqdi.

Hozirda jamoa 48 ochko bilan Angliya Premyer-ligasi jadvalida 6-o‘rinni egallab turibdi va natijalarni tez orada yaxshilash zarurati oldida turibdi.