Лондоннинг «Челси» жамоаси барча мусобақаларда кетма-кет тўртинчи мағлубиятини қабул қилиб олди. Сўнгги ўйинда «кўклар» Англия Премьер-лигасининг 31-турида «Эвертон»га 0:3 ҳисобида имкониятни бой берди.
Хилл Дикинсон стадионида ўтган баҳсда мезбонлар сафида Бету дубль қайд этган бўлса, Илиман Ндиайе яна бир голга муаллифлик қилди.
Шу тариқа, «Челси»нинг омадсиз серияси давом этмоқда. Бу мағлубиятлар занжири "ПСЖ"га қарши Чемпионлар лигаси 1/8 финалининг биринчи ўйинидан бошланган бўлиб, ўша баҳсда лондонликлар 2:5 ҳисобида ютқазганди. Кейин «Ньюкасл Юнайтед»га қарши Премьер-лига ўйинида 0:1 ҳисобида мағлубият қайд этилди.
Жавоб учрашувида ҳам «ПСЖ» «кўклар» дарвозасига жавобсиз учта гол урди. Энди эса худди шу сценарий «Эвертон»га қарши баҳсда ҳам такрорланди.
Натижада, сўнгги тўрт учрашувда «Челси» 2 та гол уриб, ўз дарвозасидан 12 та тўп олиб чиқди.
Ҳозирда жамоа 48 очко билан Англия Премьер-лигаси жадвалида 6-ўринни эгаллаб турибди ва натижаларни тез орада яхшилаш зарурати олдида турибди.













