Italiyaning «Milan» jamoasi A Seriyaning 30-turida «Torino»ni mag‘lub etib, yana g‘alabalar yo‘liga qaytdi. Shu tariqa, Massimiliano Allegri shogirdlari o‘ziga xos yubileyni munosib tarzda nishonlashdi.
Gap shundaki, xorvatiyalik faxriy futbolchi Luka Modrich uchun ushbu bahs Yevropaning kuchli beshlik chempionatlarida klublar miqyosida o‘tkazilgan 550-o‘yin bo‘ldi. Agar hozirda faoliyatini davom ettirayotgan futbolchilar haqida gapiradigan bo‘lsak, Modrichning 2008 yilda top-5 chempionatlaridagi debyutidan beri faqat fransuz Antuan Grizmannda ko‘proq o‘yin mavjud — 555 ta.
Italiya chempionatining navbatdagi turida «Milan» amaldagi chempion — «Napoli»ga qarshi maydonga tushadi.
