«Yuventus» markaziy hujumchisi Arkadiush Milik 665 kunlik tanaffusdan so‘ng ilk bor maydonda ko‘rinish berdi. Futbolchi Italiya chempionatining 30-turidan o‘rin olgan «Sassuolo»ga qarshi bahsning (1:1) yakuniy qismida 11 daqiqa harakat qildi.
«Sassuolo» bilan o‘yingacha Milikning klub miqyosidagi so‘nggi ishtiroki 2024 yil 24 may kuni «Monsa»ga qarshi bahsda qayd etilgan edi. Joriy mavsum davomida 34 yoshli futbolchi uch bor zaxira o‘rindig‘ida paydo bo‘lgandi.
Milik 2022 yilda «Marsel»dan (birinchi mavsumni ijara asosida o‘tkazgan) «Yuventus» tarkibiga kelib qo‘shilgan edi. Uning amaldagi shartnomasi 2027 yilning yozida nihoyasiga yetadi, Transfermarkt portali talqiniga ko‘ra futbolchining qiymati 1,5 million yevroni tashkil etadi.
