Yakshanba kuni Ispaniya chempionatining 29-turi doirasida «Real» va «Atletiko» jamoalari o‘zaro to‘qnash kelishadi. The Touchline nashri bergan xabarga ko‘ra, «qaymoqranglilar» uchrashuv boshlanishidan biroz oldin «Santyago Bernabeu» stadioni tomini yopib qo‘yishdi.
Ta’kidlash joizki, «Real» bunday qadamga tez-tez qo‘l urib turadi. Bunga ob-havo sharoiti sabab emas — Madridda havo issiq va yog‘ingarchilik kutilmayapti. Shunchaki, «qirollik klubi» muxlislardan chiqadigan akustik effektni (tovush aks-sadosini) kuchaytirishni va shu orqali raqibga bosim o‘tkazishni maqsad qilgan.
Darvoqe, yaqindagina «Bavariya» klubi UEFAdan «Real»ga tomni yopishni taqiqlashni so‘ragani haqida xabarlar tarqalgan edi. Ushbu jamoalar aprel oyida Chempionlar ligasining 1/4 finali doirasida bahs olib borishadi.
