Якшанба куни Испания чемпионатининг 29-тури доирасида «Реал» ва «Атлетико» жамоалари ўзаро тўқнаш келишади. The Touchline нашри берган хабарга кўра, «қаймоқранглилар» учрашув бошланишидан бироз олдин «Сантьяго Бернабеу» стадиони томини ёпиб қўйишди.

Таъкидлаш жоизки, «Реал» бундай қадамга тез-тез қўл уриб туради. Бунга об-ҳаво шароити сабаб эмас — Мадридда ҳаво иссиқ ва ёғингарчилик кутилмаяпти. Шунчаки, «қироллик клуби» мухлислардан чиқадиган акустик эффектни (товуш акс-садосини) кучайтиришни ва шу орқали рақибга босим ўтказишни мақсад қилган.

Дарвоқе, яқиндагина «Бавария» клуби УEФАдан «Реал»га томни ёпишни тақиқлашни сўрагани ҳақида хабарлар тарқалган эди. Ушбу жамоалар апрель ойида Чемпионлар лигасининг 1/4 финали доирасида баҳс олиб боришади.